ما الجديد
مرحبا بك زائرنا الكريم في منتديات حايلنا. اذا كانت هذه زيارتك اﻻولى فنتشرف بانضمامك لنا عبر الضغط على زر التسجيل وان كنت احد كوكبة اعضائنا فلا تنسى تسجيل الدخول

بيت ونص

السلام عليكم ورحمة الله وبركاته أسعد الله اوقاتكم بكل خير عقب موضوعي الأول (تعال كملنا) الله يذكره بالخير :093: فيه فكرة موضوع تنشط القسم والقريحة...

ب

بيت القصيد

بـــدر
إنضم
11/04/15
المشاركات
819
مستوى التفاعل
3
النقاط
18
السلام عليكم ورحمة الله وبركاته

أسعد الله اوقاتكم بكل خير

عقب موضوعي الأول (تعال كملنا) الله يذكره بالخير :093: فيه فكرة موضوع تنشط القسم والقريحة بعد ،،،

الصدز هي فكرتين وابشاوركم وانتم اختارو وش تبون .. وكان تبون كل الفكرتين نحط لكم كل فكرة بموضوع مستقل .

الفكرة الأولى : أكتب بيت ونص
ويجي اللي بعدي يكمل النص بحيث يكمل البيت بنفس الوزن والقافية والمعنى . واللي يتم البيت يكتب لنا بيت ونص واللي يجي بعده يكمل وهكذا ...

\

الفكرة الثانية : عكس الفكرة الأولى .
وهي اني اكتب شطر واحد واللي يجي بعدي يكمله ببيت ونص ، ومن ثم يكتب لنا شطر واللي بعده يكمله ببيت ونص وهكذا ..


كل الفكرتين فيها تنمية للموهبة وايضاً الكتابة على بحور لم يتطرق لها ،،

يعني فيها اكشن وتحدي بالإضافة إلى المتعة

وش رايكم وش نعتمد

\



:067:
 
وعليكم السلام ورحمة الله وبركاته
أسعد الله مساك ي بدر
.
انا بصراحه اشوف الخيار الأول أحسن تكتب [ بيت ونص ] والي بعدك يكمل
والراي للاعضاء .. ونشوف أي خيار يحصل أصوات أكثر
،
مشكور يالعزوه / كلك نظر وربك​
​
 
م ـبدع يالبدر دايماً بافكارك
انا بعد احس الخيار الاول أحسسن <<عطيت رائي وانا مااكتب شعر :100:
بس كمتابعه ومتذوقه لما تكتبونه :043:
يعطيك العاافيه خيو :014:
 
هلا بدر منور حايلنا


الفكرتين حلوات


وأنا أميل للفكره الأولى أكثر


الله يوفق الجميع ويسعدهم :014:
 
والله الفكرتين كلهن تقدر تقول انهن سيم سيم بعض

لكن بالحيل طيبات


أنا مع الفكره الأولى بيت ونص علي وبيت ونص ع اللي بعدي وهكذا حتى تصبح قصيده ماله نهايه :003:


الله يبارك فيك
 
بس بالله لا تصعبون القآفيه ~

عشآن مآ يبلشون الأعضآء ~

فكره رآئعه بدر "
 
هلا بدر
هلا بالابداع كله
الفكرتين جميلات وهادفات وممتعات وووو وش الدنيا بليا بنات << هذي للسجع بس
اعتقد الفكره الأولى انسب
حتى يمدي الشاعر يستوعب البحر وياخذ عليه
وانت ابوهااااااااا وسمهاااااااا

لكن انا لي امنيه
ياليت اي عضو له محاولات شعريه يدخل بالموضوع ويشارك
موضوع مثل هذااا فيه فااااايده كبيره وتنميه للموهبه خصوصا ً لما يكون مع شعراء تمون عليهم وتقدر تاخذ وتعطي معهم بكل اريحيه

.....
ثبت الموضوع يامدير:014:
وتوكل على الله يابدر:014:


ا م ط خ
 
ياسلام على الابداع يابدر


دايما افكارك مميزة


وحلو التجديد والابتعاد عن الروتين الفكرة الاولى حلوة


تحياتي يابو دانه
 
الفكره رااائعه

وانا اايد فكره بيت ونص

وعسااكم ع القوه
 
يالله انك تحييهم كلٍ بـ اسمه

بيض الله وجيهكم عل التفاعل ومشاركتي بآرائكم

إذاً نتوكل على الله ونقول الفكرة الأولى : بيت ونص

وياليت الكل يشارك ومثل ماقال ابو تركي البساط احمدي والخجل مانبيه ، كلنا نتعلم من بعض


توضيح للفكرة ..
المطلوب فقط تكتب شطر واحد ، يعني الفكرة ليست كتابة قصيدة ، الفكرة
أنا أكتب بيت ونص واللي بعدي يكمل البيت الناقص ، ومن ثم يأتي ببيت ونص ببحر أخر وقافية آخرى الكل حر فيما يكتبه ولكن الشرط فقط عند تكملة البيت الناقص يلزم التقيد بالبحر والقافية قد الإمكان ، ولا مانع من الاستشارة والأسئلة ، فهذه فرصة لاكتشاف المواهب وصقلها .

تطبيق للفكرة : مثلاً

اجي واقول :

الصبح ..! ماهو صبح من دون حسّك
.................... حـسّك غـدا عندي مع الصبح .. مبدا
بـسّـك ذحـبـك الـنوم .. يـابـنت بـسّك
.................... (؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟)


اللي بعدي يجي ويكمل الشطر اللي ناقص (على فرض إني أنا اللي بعد) <<< ابوك يالتحشيش هههههههههههه
اجي واكمل واقول :

الصبح ..! ماهو صبح من دون حسّك
.................... حـسّكك غـدا عندي مع الصبح .. مبدا
بـسّـك ذحـبـك الـنوم .. يـابـنت بـسّك
.................... (بالله قـومي .. خـلّي الـصـبـح يـبـدا)
\

ومن ثم يكتب بيت ونص أو بيتين ونص أو ثلاثة ونص أهم شي البيت الأخير يكون نص واللي بعده يكمل النص ، وهكذا ...
وما يمنع تطعيم الأبيات بشيء من التحدي بالبحر أوالقافية ، وماراح يصعب عليكم لا المطلوب منك تجيب شطر واحد فقط ^_*

\

باسم الله نبدأ :

الطـيـب مع بعض الأوادم .. خسارة
........................... كـالـحـنظلة مـا سـرّتـك لـو سـقـيته
كل ماسـقيته..! زدت فيها المرارة
........................... (؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟)


\
بانتظار ابداعاتكم
 
عشت يابدر عشت

:014:

الطـيـب مع بعض الأوادم .. خسارة
........................... كـالـحـنظلة مـا سـرّتـك لـو سـقـيته
كل ماسـقيته..! زدت فيها المرارة
........................... (واليا تركته .. قالت انك جفيته)
منشار ذو حدين .. ياكل نشاره
........................... مهما عطيته .. جاحد ٍ ماعطيته
لو له بطن ..لازم يحس بوزاره
........................... (؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟)




..
 
^
^

عاشت ايامك ياخلفهم :018:

\

الطـيـب مع بعض الأوادم .. خسارة
........................... كـالـحـنظلة مـا سـرّتـك لـو سـقـيته
كل ماسـقيته..! زدت فيها المرارة
........................... (واليا تركتـه .. قـالت انك جـفـيته)
منشار ذو حدين .. ياكل نشاره
........................... مهـما عـطـيته .. جاحد ٍ مـاعـطيته
لو له بطن ..لازم يحس بوزاره
........................... ( لـكـن رديّ .. ياعـل يـنـهـد بـيته)

\

أبو تركي شكل الفكرة ما اتضحت يا حيي .. ^_^
تبون نكملها قصيدة ؟
اللي كنت اقصده كل مشاركة بيت ونص ويكمل البيت الناقص وتنتهي ، ثم نبدأ بمشاركة جديدة بقافية جديدة .

\

يالـحالمي مـوعــدكم اللـيلة
............... موج الزعيم اليوم سونامي

ادري فـقـارى مـالـكم حيله
............... (؟؟؟؟؟؟؟؟؟؟؟؟؟؟؟؟؟؟؟؟؟؟)
 
هلا بدر
ايه الحين فهمت عليك
وكذااا احسن واسرع
تسلم حبيبي:014:
...

يالـحالمي مـوعــدكم اللـيلة
............... موج الزعيم اليوم سونامي

ادري فـقـارى مـالـكم حيله
............... ( اعذاركم طعنن بحكامي)


/ /
/ /


حبيبتي/ والجفا يصنع لنا فجوه
............... يضيع صوتي ولاتوحين احساسي
حبيبتي/ جربي تتقدمي خطوه
............... ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟)
 
حبيبتي/ والجفا يصنع لنا فجوه
............... يضيع صوتي ولاتوحين احساسي
حبيبتي/ جربي تتقدمي خطوه
............... ( تعبت أنا من جفاك وضاقت انفاسي)



وناسه / وغيوم وأجواء ممطوره
......................... يالله عساها تجتمع عند خلي
وتعطيه خيره وتبعده عن شروره
........................ (؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟)











حبيت أشارك ولا لاجينا الصدز ماأوصل مستواكم ولاني حولكم
بس نتعلم منكم
ولا تبخلون علينا بتوجيهكم
 
منورين
واحلا تشريفه ياروووبن:067:

وناسه / وغيم وألاجواء ممطوره
......................... يالله عسى ماطره ديم ٍ على خلي
وتعطيه خيره وتبعد عنّه شروره
........................ ( يفداه قلبي وعيني/ وان بغى كلي)

/

/

/

بيض الله وجه الايام .. ياباب
......................... كم كنت اظنك تنفتح لا لفيتك
ماكنت ناوي بس انا عندي اسباب
........................ (؟؟؟؟؟؟؟؟؟؟؟؟؟؟؟؟؟؟؟؟؟؟؟)
 
الله الله على الشعر والمشاعر

مبدعين كلكم فديت اعماركم


بيض الله وجه الايام .. ياباب
......................... كم كنت اظنك تنفتح لا لفيتك
ماكنت ناوي بس انا عندي اسباب
........................ ( ولو هو نساني الدرب لا ما نسيتك )


/
.
/


لمحت لك .. ما تفهم التلميح
....................... الله يساعدني على صدك
يعني تبيها ( يالغلا ) تصررريح
....................... ( ؟؟؟؟؟؟؟؟؟؟؟؟؟؟؟؟؟؟؟ )



الله يسعد الجميع ويحميهم :067:
 
منور يافهد وصح لسانك
:027:

لمحت لك .. ما تفهم التلميح
....................... الله يساعدني على صدك
يعني تبيها ( يالغلا ) تصررريح
....................... ( لاواهني من باسك بخدك)
/
/
/


لبى شفاته لاتبسم لي
....................... ااروح انا ملح ٍ بكبايه
ياويل حالي يوم تمتم لي
....................... ( ؟؟؟؟؟؟؟؟؟؟؟؟؟؟؟؟؟؟؟ )

:027:
 
هلا بوحنا النور نور عنونك وه بس

/
/


لبى شفاته لاتبسم لي
....................... ااروح انا ملح ٍ بكبايه
ياويل حالي يوم تمتم لي
....................... ( استسلم وارفع له الرايه )


/
.
/


يا بارده .. ملت سنيني تجافيك
،،،،،،،،،،،،،،،،،،،،،،، يا مطنشه روفي بقلبي وحالي
إن كان زينك يا رجا العمر مطغيك
،،،،،،،،،،،،،،،،،،،،،،، ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )



عوافي للكل :067:
 
يجب تسجيل الدخول أو التسجيل كي تتمكن من الرد هنا.
عودة
أعلى