السفينه

السفينه

استبشروا بالقاف .. يامطلبينه=واستعلموا بنفوسكم .. غاية ٍ لي
اللي يبي يركب معي .. بالسفينه=لازم يعرف .. ان البحر طايع ٍ لي
يعني انا ربان .. وسط الكبينه=اعطي اشاره .. والذكي فاطن ٍ لي
واللي مخيخه للأسف .. مايعينه=فالحوت جايع .. ينتظر مدة ٍ لي
بسم الله ابدا رحلتي .. في سكينه=والله يقديني على .. وجهة ٍ لي
تلو معي صوت الكدر .. من وتينه=واستنهضو بنفوسكم .. مقصد ٍ لي
انا بسولف .. والسوالف ثمينه=ابطوي الأميال .. في نظرة ٍ لي
هذا زهابي .. والمعاني سمينه=يقلط معي من يعجبه .. منطق ٍ لي
ياللي فؤادك منسجن في .. حنيته=مثلك انا .. طحت ابغلا دولة ٍ لي
كانك تحسب الناس .. ماهي فطينه=خذها نصيحه .. واستمع قصة ٍ لي
دفنت نفسي .. بين رمشه وعينه=هقيت محدن ياولد .. فاطن ٍ لي
خابر عيونه .. تذبح امناظرينه=لكن نظرته .. وابتسم ناظر ٍ لي
غصب ٍ علي .. قلت ارفقي ياعوينه=قلبه سكن بي .. واحسبه مسكن ٍ لي
المشكله .. قلبي وقع في كمينه=والبيض .. غيرانه تبي طعنة ٍ لي
(معذور) لو تاه الجدي .. وسط زينه=(مقهور) من فرقاه .. ياصيحة ٍ لي
اعيشها حاكم .. وانا به رهينه=هي معتقل احساس .. هي جنة ٍ لي
ان قلت ياروحي .. متى تغربينه=قالت اخافه تنتظر .. شرقة ٍ لي
حصيلتي منه الشقا .. والغبينه=الى متى والمقفيه .. عشقة ٍ لي
المسأله.. (مر وحلا) .. مهتوينه=(فرقا وذكرى) طعمها ..جايز ٍ لي
هذا تناقض .. مايفسر دفينه=الا عطيب ٍ قال : ذي حالة ٍ لي
الروح .. لو تخفي معالم كنينه=اقراه .. دامك تنحسب صاحب ٍ لي
الناس خافيها .. نضح في جبينه=ذي حكمة ٍ ياليتها .. حكمة ٍ لي
وياللي تقول الروح دايم .. حزينه=ابيك تضحك من صدى .. ضحكة ٍ لي
للبيت باب .. وللمسامع عجينه=مايقلط الا .. طيب ٍ راقي ٍ لي
حتى ضلوعي .. ماتهرّب سجينه=الا لرب البيت .. ثم وافي ٍ لي
وياللي معي ضقتوا .. تبون المدينه=تعلّموا .. ان الصبر مبدأً لي
كلن يبي يرجع لماضي .. سنينه=وانا مع الآتي لمع .. بارق ٍ لي
لازم نرسّي .. فوق امل قاصدينه=حتى لو الموجه تبي .. صدة ٍ لي
وان كانكم خنتوا عهود السفينه=فالحوت جايع .. ينتظر مدة ٍ لي

وسلامة من تااابع
بوح وجداني