المعاني

المعاني

انبلج نور المعاني .. وانتثر فـوق السطـور=حدني ماحدني .. مير اطلـب ان الله يعيـن
الورق .. ليته يكفي ماحوت بعض الصـدور=ليتـه .. يخلـي سطـوره ماتكـل ولاتليـن
كلمةٍ فيها يصير الأدمـي .. تحـت القبـور=والجسد حيٍ بزوله .. والصدر فيـه الدفيـن
عبرةٍ ماهي خجوله .. تنفجر غصب وتثـور=مبدأه مبدا رجوله .. والبشر مخلـوق طيـن
اشرب الكاس بمراره .. وابتسم عند الحضور=واتصـدى للنيـازك ..كافـرٍ بالكافـريـن
الحروف الابجديه .. من صراحتهـا تجـور=والضمير الغايب اعرابه .. يثيـر الحاقديـن
المناظر .. ساكنه داخـل مناظرهـا بسـور=مايبدلهـا زمـان .. ولايزعزعهـا طنـيـن
في زمان المصلحه .. نسمع نباحك ياثغـور=نكرمك مره ومره .. ثـم تعـودي تنبحيـن
الزمن دولاب داير .. فيه خيـرات وشـرور=الزمن يعطي دروسٍ .. يفهمه عقـلٍ فطيـن
الزمن مهمـا يقفـي .. او يعاملـك بدبـور=مايشين الا يزيـن .. ومايزيـن الا يشيـن
الصدر دوله عظيمه .. والقوانيـن الشعـور=والبشر داخل وطالـع .. والبقـا للناجحيـن
التجارب والمواقف .. للذكي كـرت العبـور=والفهيم اللي .. يترجمها ولايصبـح مديـن
كم رجـالٍ ضيعتهـا .. مهمهيـات الغـرور=والعلامـات الأكيـده .. شايفينـه بالجبيـن
الكبر للواحـد المعبـود .. يـاذاك الهـذور=لايغـرك ماجمعتـه .. باليسـار وباليميـن
وكم رجالٍ كنت احسبه .. بالمواقف ماتخـور=الله يسلم زمـانٍ .. يكشـف اللـي بالكنيـن
ياكثر ماقد سمعنا .. من بطـولات الصقـور=واثرها من قوم دجه .. مالها منهـج وديـن
وكـم رجـالٍ .. ماحكـت الا ببهتـانٍ وزور=حقدها في دمها .. جـاري بمجـراه اللعيـن
والعجب كل العجب .. ماتنطـق الا بالفجـور=الدلايل للسوالـف .. يتبـع الكلمـه يميـن
وكم رجالٍ كلمـا عدلتهـا .. صابـه كسـور=ماتعـدل لوقسينـا .. ماتعـدل لـو نلـيـن
سبخة الارض العقيمه .. ماهقية انـه تثـور=الزراعه لـه ديـارٍ .. كلنـا لـه خابريـن
وكم رجالٍ تطلب الراي السديد .. وله تشور=وان تعثر حظهـا .. قالـت وقعنـا بالكميـن
النوايـا والسوايـا .. يعلمـه رب البحـور=كل مخلوقٍ يحاسـب .. عنـد رب العالميـن
ماعلينـا ماعلينـا .. كـل رجـال مخبـور=ياعسى لامن ذكرنا .. نذكـر بفعـلٍ حسيـن
انتهى مشوار قافي .. والزمن دايـم يـدور=والحقايـق مايغيبهـا .. كـلام المغرضيـن
الثنا والشكر للخالق .. عدد نبـت الزهـور=فاح به صدر القناعه .. كل يوم وكـل حيـن
والختام ازكى صلاةٍ .. عد ساعات الدهـور=للنبي المصطفى .. المبعوث للناس اجمعيـن

وسلامة من تااابع
بوح وجداني