المحبه

من قصائد المرحة الثانية (الجديدة)

ابرقي يالمحبة بالحشا و أرعِدي=واستهلي وهلي هلهلا هلهلا
واسكني بالضماير وانزلي واصعدي=واسحبيني معاك واشبعيني غلا
واجرحيني بقلبي واضربي لي يدي=وامزحي واضحكي لي وابتليني بلا
لو شكيتك لقلب بالضلوع اركدي=كان طار وتفرفر مثل طير الفلا
ولو شكيتك لعيني زاد فيها ارمدي=عقب ماهي مثل عين الغزال اكحلا
يا طيور المحبة غردي وانشدي=رفرفي بالخفوق واصدحي يا لالا
ليتني يالمحبة بالهوى مبتدي=بس لي يا المحبة جولة وصولا
يالمحبة عزيز النفس ماهو ردي=لكن الحظ نايم والبخت ميلا
يا هنوف لمحتة من بنات بلدي=تطرح الطير لو هو طاير واعتلا
يوم شفتة همومي بالحنايا اطردي=ليتني ما لمحتة ليت قلبي سلا
أكحل العين خده مثل ورد ندي=والرموش الظليلة والمبيسم حلا
واسود فوق متنه والثنايا بردي=ناحل الخصر جسمة بالردوف امتلا
يالعيون السهيرة جنِّبي مرقدي=فعل خلي بقلبي فاضحن بالملا
يا نجوم المجرة طالبك واشهدي=ما بعد حب خلي حب ولا به غلا

وســــــلامتكم