الالفية

من القصائد القديمة

الف وليف الروح ما شفت زية=لا بالحضر ايضا ولا بالبرية
ظبي سلب حالي وغير علية=من يوم شفته حالتي دون في دون
والبا بليت بحب مزبور الانهاد=اللي خذا قلبي وقفا ولا عاد
في ديرته يا ناس مالي بمقعاد=لا عاد مازاور وانا منه مشطون
التا توردني جروح بروحي=للحب وراع الحب ماهو بيوحي
يازين ما تشفق تداوي جروحي=اللي لهبهن بين الاضلاع مركون
والثا ثلاث شهور في ديرة الزين=مجروح قلبي بين الاضلاع مسكين
يناس هاتو لي حبيبي يداوين=وان كان ماجاني فنا الصبح مدفون
والجيم جرح القلب ماهو بطايب=لا قلت طاب الجرح زاد بعطايب
وقلبي من اسباب الحبيب عطايب=ماهو بمرتاح مع الزين مرهون
والحا حمام الورق هيض شجوني=من يوم ماغرد بعال الغصوني
واجاوب القمري يا ناس ارحموني=بصوت طويل وتقل ماهم بيوحون
الخا خيار البيض غالي علية=وراع الهوى قام يتغلى عليه
منها وعيني في منامه شقيه=اشقيت عيني يا بعد كل مزيون
والدال داو الجرح وانته طبيبه=انته طبيب القلب وانته حبيبه
وانت السبايب بالجروح العطيبه=واجروح قلبي بالحشا مالها لون
والذال ذاب القلب يا نور عيني=ويش استفيد ان قلت تبكيك عيني
ما لي رجا يا كود ربي يعيني=رب العباد اللي له الخلق يشكون
والرا رعاه الله عن كل شيطان=الصاحب المملوح مدعوج الاعيان
اللي سلب قلبي معه صار برهان=لو هو يجيني ساعة صار ممنون
والزا زرعت ولا حصدت الزروعي=يلايمي واسقيه من ما دموعي
والخاتمة مطعون بين الضلوعي=ياناس دلوني على اللي يداوون
والسين ساقتني قرادة نصيبي=لديار بدو ما بها لي قريبي
ولا علمت الا وقلبي عطيبي=ماله دوا يازين غيرك بها الكون
والشين شاب الراس وا عزتالي=سبايب اللي يدرج كالغزالي
من يوم شفتة رجعن للهبالي=غديت بين الناس بالحب مرهون
والصاد صاب القلب بسوم عينه=من يوم ما خلي نظرني بعينه
قلب تولع فيك ربي يعينه=يمشي مع العالم وهو تقل مجنون
والضاد ضاق الصدر والعين هله=على وليف بالهوى ما حصله
وجسمي من اسبابة غدت فية عله=كل نشدني قال وشفيك هاللون
والطا طرا لي في منامي وفزيت=تعذبت روحي بهواهم ومليت
يا ليتني لديارهم ما تعديت=ولا عرف قلبي هوى كل مزيون
والظا ظهر بين العذارى الجواري=مثل القمر بين النجوم السواري
وعزاه ياقلب طرا له طواري=صيَّح وبيَّح كل ماكان مكنون
والعين عبراتي تجرح خدودي=على الذي يشبه ظبي النفودي
يا لايمي حبة بقلبي يزودي=مانسا هواها لو لقلبي تلومون
والغين غرو ياهلي سم حالي=واقفا وخلاني تقل ما درا لي
في غربتي كني سجين لحالي=لولا النشاما اللي يصفي يسلون
والفا فراق الزين زود غلاها=والبعد عن عيني يزود حلاها
الحب للروح العزيزة علاها=الشاهد الله صرت بالحب مفتون
القاف قلبي في هواها تولع=ظبي النفود اللي لقلبي تطلع
ومعلوق قلبي بالضماير تقطع=على الذي حبة بقلبي له افنون
والكاف كل في هواها غذلني=يا ناصحي نصحك لقلبي قتلني
وحب الحبيب ياهلي لو هبلني=احلى من السكر على الكبد بفنون
واللام لا واللي رزق كل مخلوق=حبة بجوف القلب شوق على شوق
منساه لين اني من الموت مخنوق=ساعة زمان وجسمي الميت مدفون
والميم ما بالقلب قاله لساني=وانا اشهد ان الله بحبة بلاني
والحب باقصى القلب زاد امتحاني=ياليتني ياليت ما بت مشطون
والنون نور العين يا ناس وش جاه=الجادل اللي ما لقينا حلاياه
وش جاه من قلبي علامه تناساه=بالهون يالغالي على القلب بالهون
والها هوا قلبي نسي ما فطن له=والقلب من عقبه غدت فيه عله
جعل العذارى كلهن فدوة له=واللي زعل لك ياريش العين مديون
والواو واويلي من افرق خلي=اللي معه قلبي وعقلي مولي
والوقت فات وصاحبي ما حصلي=واليوم ما ظن الحبايب يعودون
واليا يقول اللي تولع بغاليه=صلو على اللي والي العرش هاديه
عد الشجر واعداد سحب تسقيه=على النبي ياللي حضرتو وسمعتون

وســــــلامتكم