خلاقين ياقلب العنا / خلاقين وش ذنبي أنا .. دعوه للمشاركه !

مساكم الله بالخير يالربعات < وقلت الربعات عشان مايجينا الناي منبرش ويبحث عن أنوثته المفقوده معنا


وشلونكم كلاً بيوزره أدري انكم بخير وفسقانات في رمضان ماغير نوم وتبطح عند المكيف


أما أنا لحد يسألني بالله وشلوني ؟!


من سوق لسوق ومن محل لمحل مافيه سوق في الرياض مانفضته كله عشان خلاقين العيد , لاعادت

تسيف أن ذوقي ذوق عبده ولايجوز لي أي شيء وفوق ذلك الاعراف في العيد تحتّم عليّ إني أنتحر وأنا في السوق
وبما إنّا كل سنه في عيد الفطر نعيّد في الديره , فَ جُرم وذنب عظيم إذا لبستي لبس المدينه وجيتيهم يآخذون سمعه غلط عنتس ويعتبرونتس فاسقه فاجره خالده مُخلّده في النار هههههههههههههههههه



فَ كلّ مافريت السوق مع أمي ولا لقيت شيء قلت لأمي : أنا حزينه أنا مضطربه أنا مسكينه أنا ضعيفة شخصيه أنا لم أجد اللبس المناسب !
هههههههههههههههه بهالأسلوب وهالكلمات , عاد المسيكينه يرتفع ضغطها وتهاوش جعلتس وجعلتس وأنا ميته ضحك


وبما إنّي فريت قبل رمضان بأسبوعين وهالاسبوع ومالقيت شيء زين طرت عليّ إني أفصلّ صح إنه صعب ويبي له وقت ورآي ومشوره , بس يالله مو مشكله

أهم شيء أطلع بمنظر أوك







ومن هالشيء بدرت ليّ فكرة إنّا نتشاور على اللبس واللوك بشكل عام في كل وقت " يعني موب مقتصر على العيد فقط "

منها نطلع بفايده , ومنها نتعرف على أذواق بعض

ملاحظه :


- مانبي ردود شتشته أياً كانت " فيه مواضيع بسوالفنا مخصصه فيها " !

- من مبدأ [ لولا أختلاف الاذواق لبارت السلع ] ياليت ياليت و " حطوّا تحتها سبعين خط " إنو مانتريق على أذواق الناس مهما كان

- هالموضوع بعيد عن يوزرات العيال :)

وآخيراً .. الموضوع لكم

ههههههه يآحياتي حيااتس تفرين فالسوقه مالقيتي شيء .. نفس الحآله <

المشكله ان مجتمعناا مايرضى ان نلبس مثل النآس والاواادم .. لاحول ولاقوه يآربي سترك ..
وش تبين تفصلين يآبنت .. والله مالتس داااعي تفصلين دوري لابد ان تلقين لتس شيء منآسب ..
اوما التفصيل يبي له عصر مخ وتفكير ولعنة ثوآءء .. وآخخخخر شيء ماايطلع بنفس الشكل اللي في بآلك .. < آسآلي مجررب

آكثر مآكثر آلله المولآت عندكم .. روحي دوجي لين تكسر رجيلااتس .. اكيد اكيد بتلقين ..

وان مالقيتي دقي علي آجي احشرتس والبسك غصب .. خلي مزااج العبيد


* آدعن لي بآلله القااء لي شيء سنع .. <

هههههههههههههههههههههههه
ياحبي لتس ياخيشه ,
اذا خوي اخوي دق عليه وقاله ياولد فصل للعيد من الحين لآ يقولك الخياط قابلني بعد العيد
تبين تفصلين !!
لا وبالريآض .. انتم خلقه تطفحون من عدد السكان وين تلقين اللي يخيط لتس قبل العيد
اول شي تأكدي ان في مشغل بيخلص لك قبل العيد باسبوع اقل شي عشان اذا خرب ولا شي , ولا ارجعي فري بالسووق ,
مممم واذا ع المحلات برمود دايم عندهم شي طويل ومرتب

^
^

يلاتس ما تعرفين ذوقها المعوق عشان كذا بكل براءة تقولين لها
برمودا
شوفي يا حبي لتس انا كنت اشوف ذوقي اعوق ذوق بالدنيا بس من عرفت
خيشة سجدت سجدة شكر لان في رجا مني ومن ذوقي والدليل اني هالمره لما
جزمت خلصت مقاضي العيد بأول عشرة من رمضان
عاد قسم بالله احس امي وابوي موب مصدقين حتى ابوي يقول لي يعني
ليلة العيد مافي " يبه للحين ما لقيت نعال " ولا في " يبه باروح ابدل هالبلوزة "
ولا في هوشة من أمي مع كلمتها المعتادة " أنا مدري من وين جبت هالعاهات "
>> من مخباتي الله يسلمتس


.
.

نجي لابو تكرن خيشة
شوفي بعد اللفه والدوران ولو اني عارفه انتس فريتي كل هالمحلات لكن من باب المساعده
>> وش عندها نازل ملاك الرحمة
شوفي اكثر شي حسيت عندهم شي مرتب وينفع للعيد عندك زارا فيها تنانير حلوة
و إيسبرت وبيرشكا عندك برضو مانقو عندهم أشياء رايقة
ارجعي دوري ازين لتس من التفصيل الا اذا عندتس وحدة تخيّط كويسة وضامنتها

اقتراح بسيط يمكن يعجبتس



شوفي بصراحه هالتنورة تجي ع اللبس شي أليم للنخاع وتقدرين تطقمين معاها نفس للبلوزة
اللي بالصورة وموجود بزارا نفسها وفي بيرشكا بس السحاب من ورا
وتقدرين تطقمين عليها جاكيت بوي فريند وتحته بدي بعد يطلع شي حلو بس ترادشنل حركة الجاكيت
يعني خليتس ع الصورة مرتبة


.
.

بما إن موضوعكم استفسارات وطقتها شريت فوستان اسود شيفون وكنت اتوقع يجي للركبة
وتحتها شوي وشلته ولا انتبهت انه قصير حبتين و لما قوسته بالبيت طلع قصير لفوق الركبة بشوي
ولما سألت أمي قالت لي البسي تايت أسود مدري احسه بيطلع مطاريس وش رايكم ..؟
ألبس تايت ولا أكنسله من قائمة العيد وأخليه لما يجي وقته


قبل افاردز دوتس

المشاركة الأصلية كتبت بواسطة D O S H A

^

بما إن موضوعكم استفسارات وطقتها شريت فوستان اسود شيفون وكنت اتوقع يجي للركبة
وتحتها شوي وشلته ولا انتبهت انه قصير حبتين و لما قوسته بالبيت طلع قصير لفوق الركبة بشوي
ولما سألت أمي قالت لي البسي تايت أسود مدري احسه بيطلع مطاريس وش رايكم ..؟
ألبس تايت ولا أكنسله من قائمة العيد وأخليه لما يجي وقته


قبل افاردز دوتس

^^^
هاذا الشي مرا حلو ..

خيوشش التفصيل اطلز شي
بس اختاري مديل كوشخه ولون اكشخ وقماش كوشخه ومقاس كويشيخه ويزبط
انا بالاعياد يااشتري من بوتيكات اشيا يفصلونها ثم يبيعونه
وطحت لي علي خياط روعه كل ماعجبني شي طبعت الصوره وشريت القماش وحمد لله روووعه لي٥ سنين علي هالحال
لان اكره بالعيد الجنز والسبور

ونضامي فساتين ستايلها شوي فيه قصات ولون ساداه او بدل رسميه بتنانير قصيره

ولو بتروحين لناس نقادين البسب كيلون غامق وريحيهم



دوشااا ترا البس القصير مره حلاته بالكيلون الاسود الشفاف وربي فخااااامه



واتمنى افدتك

خيوووش في فساتين شفتها من يمكن 6 شهور عند مانجو مره حلوه وطويله واحلى شي فيها انها ناعمه وتصلح لعيد
مادري اذا للحين عندهم ولا لا .. ومادري اذا اللي عندكم نفس اللي عندنآ ,

الجادل : مشكلتنا عادي نلبس اي شيء بس عيد الفطر حاله استثنائيه مانلبس عندهم بناطيل ولا قصير ولاشيء , نظام الديره يعني
وبعدين مالقيت شيء قسم بالله عشان كذا اقول ابفصل كل السوق سكيني وشغل ملحجه



شمر : حسستيني ان الرياض مافيها الا خياط واحد ومشغل واحد ههههههههههههه لا أن شاء الله بيفصلون
الزحمه تجي في الآواخر , هي اللي الواحد مايقدر يسوي شيء فيها + مانقو ولهم 6 شهور تروح ماتقعد


دوشا : قسم بالله أنتس أحقر آدميه على وجه المعموره زارا أكثر شيء عندهم الرسمي يعني أن كآنتس تبيني أشتغل على مكتب لبست من زارا صح أني شريت من عندهم جاكيت فوشي واورنج بس يوم قلّبته في مخي حسيت انه حق بنات 15 سنه




أنا ديني ودين التنانير البيضاء وشلون لو كان قماشها مكسّر بعد
نظام المكسّر الليّ هابين فيه المحلات ماحبيته يصلح للعصاقيل مره وانا مانيب من هالنومنه حفظني الرب


أمّا بالنسبه لتس مع الاسوداني خذي تايت مشجّر زي اللي قالت شمّر أو تايقر







بيجي تسطيييل







عنود : أي والله صادقه أكره شيء الجنز والسبور في العيد حلو التفصيل للفساتين النعومه
أمّا التنانير والبلايز ماعمري جربت وهاذي أول تجربه لي إن الله أحيانا

هالعيد أنا مفكره أكسر الألوان بشكل مو طبيعي مليت من الألوان التقليديه





فكرت اسوي نفس هالموديل بس الدانتيل الأسود أخليه إلى حد المثلث والباقي أطوله


وشفت شنطه أورانج في غرناطه أعجبتني بس أحترت وش ينلبس معها وخليتها
ولمّا قعدت افتش في الصور شفت هالصوره وقررت آخذ نفس هالالوان





طبعاً هالشيء بيكون أول العيد في الصباح !








وهالشيء الجمييييل دخل مزاجي , فريت كل أبو الرياض عشان القى تايقر نفس هالشكل مافيه
كل التايقر ياعلى ستان يلمع يا أن اللون حقه مايخارج يجي البيج كأنه على أصفر
دورت في حق الاقمشه برضوا مالقيت بس إن شاء الله أني بأفرفر ألين القاه

أي صح نسيت أقول لكم إنّا نقعد 4 ايام في الديره وكل يوم فيه غداء وعشاء
وكل يوم نحضر < عشان تعرفون مدى التوهيقه بس

هذي موديلااات حلووه شووفي اللي عجبج