حوار بين شاعرين

أنثى جموح :

بسم الإله المنزل لـْ كلّ البشر أعظم كتاب
.......... أبدا بيوتي يا هنا حرفي إلى حاور طلال

يكتب قبل ينطق ولا تلحق تسكّر فيه باب
.......... الله يحَفظ اللي كتب صيته رسى فوق الجبال

طلال المحياني :

بسم الذي يغفر ذنوب العبد كان العبد تاب........
نبدا على وضح النقا والشك يا العرّاف زال

ترى حلاه الرّجْلِ يِنْشد ويش ودّا ويش جاب..........
وانتي هرم يالغاليه واحس في قلبك سوال


أهلاً ولا تكفي طلالك ما لقى عندي حساب
.......... ودّي تقول اللي طرا واللي خطر عندك فِـ بال

همي أسولف بالشعر ما همّني كثرة عتاب
.......... إقلط ولا تلقى مردّ إلا من اعلوم الرجال


يالجامحه دام البقا ياسيد تلعاب الرقاب..........
واللي خطر واللي طرا محفوظ يابنت الحلال

ماتلحق الشكات كود اللي حصل فيه ارتياب..........
واهل الوفا عاداتهم تبقى ولو الوقت طال


أشهد بأنك يا وفي ترقى على هام الصعاب
.......... والوقت لا ضاق الصدر نادى لك بإسمك تعال

إشهد على عزٍ سكن في داخلي له يا شهاب
.......... إليا تمرّ بْـ ليل همي خبّر اسهول وْ تلال


كلمه وتارسها العسل مخلوط معها سم داب..........
لكنها تمشي على شان الحسن ويا الدلال

اثر البلا فالعين ياللي تحسب إنه فالنقاب..........
وهمك نشيله كان همك كسّر ظهور الجمال


إسمح لي بْ كلمة (وفي) , لا جبتها لك في جواب
.......... أقصد بها يا ((وافيٍ عهده)) ويا ((طيّب وصال))

شكراً ولا تكفي حمولة همّ ولا تكفي نصاب
.......... قدرك على قدري علا يا زين فعلك والخصال


لا تعتذر دامك صواب وكل ما قلته صواب..........
يا معرب الجدين مابين العمومه والخوال

انت القراح وغير الانثى فالحقيقه هو سراب..........
ياكبر قدر الجامحه عندي بعد جالي مجال


مدري كذا ماني على بعضي وبي لمحة ضباب
.......... احترت نحكي في فروسية عرب وللا قتال

وللا نخصص جوّنا لاخبار أبو نورَ وْ رباب
.......... نتبادل ألوان الشعر من صوت ذكرى أو نوال


ماني بحاسب للخطر ولا لمنع الاقتراب..........
عنتر حضر يالجامحه واسقاك من شقر الدلال

جوّك معَ جوّي مشى والشر يالمجمول غاب..........
دام القمر حاضر معي مالد عيني للهلال


توّي عرفت اني قمر يا زهرة أيام الشباب
.......... يا حسرة أيامٍ مضت من دونها قُصْر الفعال

كم ساعةٍ ضاعت سُدى ما ينذكر فيها عقاب
.......... كم جلسةٍ مرّت ولا فيها سوى قيلٍ وقال


ليتك سألت مرايتك يمكن تجاهلت العتاب..........
خل التحسف يالغلا ما قدمك الا طيب فال

ياهل الحكي بعض الحكي فيه العجب فيه العجاب..........
مثلك يجيبه صادق الدعوه وصدق الابتهال


واسمح لي بـْ ختمة محبٍ طالبٍ حسن المئاب
.......... ينصحْكِ من أجل الحياة الآخره ما هو لمال

اسأل عن اللي يسألك وصلٍ ولا تكشف حجاب
.......... السر لا لا تفضحه وابعد عن ارخيص المقال

لا تجعل الماضي سوى حكمة عقل فيه اكتساب
.......... واترك بقايا سيرة المقفي على سور النضال

هاذي بيوتن خاتمه للي بديناه احتساب
.......... الله معك , بس يحفظك / يبعدْك عن شر الهزال

يجمعْكِ بالجنه مع المحبوب مع خير الصحاب
.......... آمين ِ صلي ع الرسول بْـ عدّ ما تحصي رمال






وسلامتكم
*

رد قوي وجميل من طلال

قصيده رائعه بالفعل وتستحق النقل

ذوق راقي خيتي اقسى والف شكر لامتاعنا بهذه القصيده

حسيته غزليه ولالا

لو اني ماافهم بالمحاوره كثير

بس روعه

والاروع ذوقك ي آآقسسى

انا هو انا متعتكم بهالنص مطلبي
ويسعدلي هالمرور



صمت
اي غزليه بس فيها شوي بالبدايه لبس
يسعدلي هالمروور

صح لسان الجامحة وصح لسان طلال

وصح ذوقك يا اقسى

ردية رائعة بين الشاعرة والشاعر

بس ليتك وضعتي اسم الشاعرة قبل ابياتها واسم الشاعر قبل ابياته

عشان تكون واضحة للقارئ لان الابيات بيتين للجامحة وبيتين لطلال
الا الخمس الابيات الاخيرة اعتقد انها كلها للجامحة


والله يعطيك العافية يا اقسى

مودتيـ

بدر حياك الله

وفعلا كلامك صح بيتين للشاعره وبيتين للشاعر والخمس الاخيره للشاعره


انا كنت ناويه اسوي ابيات الشاعره يمين والشاعره يسار بس مازبطت معي :(