الفناجيل

من قصائد المرحة الثانية (الجديدة)

كثر لي الهيل يا دحوم بالدله=راسي مصدع يبي من كثرة الهيلي
واليا خدر هيلها سقها علي كله=حطه بجنبي وهات احلي الفناجيلي
اول فناجيلها يازين ريحٍ له=من ريحته يستفيق الراس عن ميلي
ثاني فناجيلها يازين طعمٍ له=مرارته فرقت مر الغرابيلي
ثالث فناجيلها يازين لونٍ له=ترتاح له عين من عينه بها غيلي
رابع فناجيلها يا زين صوتٍ له=اليا اندلق صبته وسط المعاميلي
خامس فناجيلها للكبد طب له=فيها شفا الكبد عن بعض التفاصيلي
سادس فناجيلها والله مامله=الا اليا ملت الصحرا المخاييلي
سابع فناجيلها يبري لي العله=اللي بوسط الحشا غنت مواويلي
ثامن فناجيلها خله علي خله=اليا بدعت القوافي من يغنيلي
تاسع فناجيلها جازت لي الشله=غنيت طرق الهوا لـله وياليلي
عاشر فناجيلها للراس لاعله=يصفي مزاجي ولا يحتاج تعديلي
واليا تعدل مزاجي رحت للشلة=ابي على الصفحة الزرقا تعاليلي
ادخل عليهم وانا في خافقي عله=اضحك واسولف واكثر من تحاليلي
معهم غزالٍ يهز القلب ويتله=يحدني للهوا والشوق والليلي
الله على من حمس قلبي على المله=غرو اليا من ندهلي .. قلت ياويلي
جدد جروح الهوا بالقلب وانهله=مثل المطر وان همل وسط الهماليلي
انا اتعذب وهو يضحك على الزله=يانا على ضحكته مبسوط بالحيلي
ماهو بعيد ولكن ماقدر اوصله=يكيل لي بالهوا ... ياليت ياويلي
والله يالولا الحيا والخوف والذله=ونتايج ما لها عد وتحصيلي
وهرج يخلي سليم الحال منسله=لااصرخ واصيح واكثر من اقاويلي
ياناس لمو حياتي مع حياةٍ له=لعل باقي ليال العمر تصفيلي

وســــــلامتكم